KADA MANANG PACING, JSPH, Kdpy*

Sentosa on a gray day, from Vivo City, Singapore

Some of these books and magazines have been donated to village libraries in Ilocos Norte

My jogging route to Benton and back in Winchester

Kas iti dalluyon nga agapon iti malem
Agsublitayo latta iti taripnong iti kalgaw
Nga ubing manen ti kigaw a sirmata iti aringgawis
Ta kasano a pumusay ti saan pay a naipasngay
Iti awan patinggana a panagsapul iti dayag?
Nalmes ti dungsa iti kape ti linnagip iti baet
Ti saan nga aggibus a dung-aw ti baybay
Iti pannakapespes dagiti darikmat iti isusuknal
Iti bukodtayo a siudad ti Jerusalem.
Ngem iti daytoy a kaltaang ti rabii
Apay ngata a nalipatanda, ay, nalipatanda
Daydi immuna a balla a nangtiliw iti kararua
Ti daniw-samiweng ti timpuyog a pinutarna?
Apay a nagsayukmo ni Manang Ising?

Kas kadakayo ken nalabit ken ni Manang Pacing
Ammok laeng daydi  apuy a simgiab idiay Sison
A nangsilmot met kadakami kadaydi Lina ni Gene
Da Binot, Lito, Virginia, Jimmy idiay Laoag
Ammok laeng ti areng-eng ti rinibu a kutibeng
A nangngegko kadaydi Manong Pel, Manong Viring--
Isuda amin a limmaksiden a saan a nagpakada.

Apay ngamin, aya,  daytoy patinayon a suknal?
Awan imeng ti kapanagan ket nadagaang
Ti parbangon a saepsaepan dagiti babassit a nagpayak.

Kas iti estatua ti santo a binigat nga agpadaan
Awan paksuy dagiti mata uray kuridemdemen.
Adu dagiti saludsod a tawataw ti sungbatna.
Iti lugan nga agawid, awan ti arimekmek
A kasla ket sangsangalen pay ti sarita ti adu
A bariw-as, panagbirok iti imnas ken kanta

A mabalin nga isaang iti karaang ti tabbaaw, am-amangaw
 No di man panagdayaw kadagiti sumaruno a panagkikita. 

ANDRES MIGUEL PASION
Menifee, CA


*Manipud iti PASIKING a libro ni Lito de Francia